Frá skólastjóra
Eins og kynnt var á föstudaginn þá eru óbreyttar sóttvarnareglur í skólum. Við
höldum því okkar striki. Meginreglurnar eru þær að 50 nemendur geta verið í
sama rými, 20 starfsmenn geta verið í sama rými, grímuskylda á starfsmenn í
opnum rýmum og ef ekki tekst að viðhafa 2 metra frá öðru starfsfólki og
nemendum, nemendur eru undanþegnir fjöldatakmörkunum á göngum og í frímínútum.
Búið er að opna matsalinn og skipta honum í tvö hólf. Spritt er aðgengilegt í
öllum rýmum skólans o.fl. Reglurnar gilda til 2. febrúar nk.
Róðurinn þyngdist verulega í síðustu viku en um 20-30% nemenda hafa verið frá á
hverju degi auk þess sem vantað hefur 20- 30 starfsmenn dag hvern. Okkur hefur
samt tekist að halda úti nokkuð eðlilegu skólastarfi en aðstæður eru vissulega
krefjandi.
Ég minni á mikilvægi þess að fara með börnin í skimun ef einkenni gera vart við
sig. Ekki senda börn í skólann með einkenni nema búið sé að ganga úr skugga um
að það sé ekki Covid. Ef Covid er staðfest hjá barni og foreldrar fá
upplýsingar um það eftir 15:30 eða að smit er staðfest um helgi er mikilvægt að
senda póst á skólastjórnanda. Á virkum degi, fyrir 15:30, á að hafa samband við
skrifstofu, umsjónarkennara og/eða skólastjórnanda. Smitrakningarteymið hefur
ekki tíma til að láta okkur vita strax og því mikilvægt að foreldrar láti
skólann strax vita. Einnig er gott að fá upplýsingar um það ef það kemur
jákvætt úr hraðprófi. Þá gefst tækifæri til að undirbúa smitrakningu og málin
ganga fljótar fyrir sig.
Reglum um sóttkví og einangrun hefur verið breytt og
ég hvet ykkur til að kynna ykkur þær reglur. Sjá hér fyrir neðan.
Sóttkví: https://www.covid.is/undirflokkar/sottkvi
Einangrun: https://www.covid.is/undirflokkar/einkenni
Að lokum langar mig að senda hlýjar kveðjur til þeirra sem eru í einangrun eða
sóttkví. Við erum í þessu saman og saman komumst við í gegnum þetta.
Með bestu kveðju, Lars Jóhann Imsland skólastjóri