Sóttvarnir í Hraunvallaskóla
Minnisblað sóttvarnalæknis um breytingar frá 5. október, til og með 17. október, kveða á um að grunnskólastarf verði óbreytt en samt gildi þar 30 manna hámarksregla fullorðinna í hverju rými og 1m fjarlægðarregla. Lagt er upp með að skólastarf verði með venjubundnum hætti en samt sem áður er nauðsynlegt að gera nokkrar breytingar sem í grunninn snúast um að einfalda skólastarfið eins og kostur er. Þannig mun Gulldrekalottó frestast, allar vettvangsferðir nemenda falla niður þessa daga sem og tónlistarkennsla sem fer fram í Hraunvallaskóla.
Búið er að gera nauðsynlegar ráðstafanir innan húss sem snúa að því að minnka samneyti og blöndun starfsfólks. Vinnusvæði starfsmanna hafa verið skilgreind og afmörkuð, matar- og kaffistofum hefur verið fjölgað og samstarf og samvinna færð yfir á rafrænan máta eins og kostur er.
Allur umgangur utanaðkomandi inn í skólabygginguna er bannaður þessa daga. Ítrekað er að foreldrar eiga ekki að koma inn í skólann nema hafa fengið boð frá starfsmanni skóla. Þeir sem fá boð um að koma inn í skólann þurfa að vera með grímu til að minnka hættu á smiti.
Við viljum biðja nemendur,
foreldra og starfsmenn um að gæta vel að almennum sóttvarnaaðgerðum því það eru
þessar einstaklingsbundnu sóttvarnir sem skipta öllu máli. Þá viljum við minna á viðmið um hvenær
grunnskólanemendur og starfsfólk eiga EKKI að mæta í skólann.
Nemendur/starfsfólk eiga EKKI að mæta í skólann ef þau:
• Eru í sóttkví, einangrun eða bíða niðurstöðu
sýnatöku.
• Hafa verið í einangrun vegna COVID-19 smits og
ekki eru liðnir 14 dagar frá útskrift.
• Eru með flensueinkenni (kvef, hósta, hita,
höfuðverki, beinverki, þreytu, kviðverki, niðurgang o.fl.). Miðað er við að
skólabörn og starfsfólk skuli vera hitalaust a.m.k. einn sólarhring áður en þau
snúa aftur í skólann ef veikindi stafa af öðru en COVID-19.
Það er nauðsynlegt að fara sérstaklega varlega
um þessar mundir og við þurfum að hjálpast að við að gera allt sem hægt er að
gera til að koma í veg fyrir smit í skólanum okkar og koma í veg fyrir að stór
hópur þurfi að fara í sóttkví.
Tökumst á við þetta saman. Við erum öll almannavarnir!